Hoxe visitou o noso centro Félix Freire, o profesor e catedrático de Química Orgánica da USC, que impartiu a charla “Gastronomía Molecular” á que asistiron alumnos de 4º ESO e de 1º de Bacharelato. Explicounos os procesos químicos responsables do pardeamento das froitas e verduras, da coagulación da clara de ovo e da caramelización dos alimentos. Falounos da química responsable dos cambios de color asociados á cocción dos mariscos e das verduras e do cambio da tonalidade das carnes en función do tempo de exposición ao osíxeno. Tamén de moléculas presentes en bebidas que teñen aplicación farmacolóxica como a quinina.
Informounos da reacción de Maillard, presente a diario na cociña cada vez que se emprega a grella ou a prancha para preparar alimentos, que mellora o color e a textura destes, pero supón a aparición de acrilamida (clasificada como posible canceríxeno).
A charla resultou de interese e entendemos diferentes procesos da industria aos que se someten algúns dos alimentos que consumimos a diario.
Comentarios
Publicar un comentario