Saída matemática. Estimando a altura da Colexiata de Iria Flavia mediante a semellanza de triángulos

O 9 de xuño, o alumnado de 3º de ESO participou nunha saída educativa, enmarcada dentro do Proxecto Terra. Desprazouse ata a igrexa de Santa María de Iria Flavia, co obxectivo de aplicar directamente nun contorno real os conceptos matemáticos que se traballaron na aula: a semellanza de triángulos.

Os/As estudantes realizaron diversas medicións directas do lugar. Con estes datos, e empregando os principios de semellanza de triángulos, estimaron a altura total da igrexa.

 

Esta experiencia práctica permitiu aos alumnos e ás alumnas comprender mellor a utilidade das matemáticas na vida cotiá, fomentando ademais o traballo en equipo. Unha actividade enriquecedora que complementa de maneira efectiva a aprendizaxe na aula.

  

A saída contou tamén coa colaboración do profesor de Xeografía e Historia do noso centro, Xoán Santaló, que ofreceu ao alumnado unha pequena e interesante charla sobre a arquitectura e a historia da colexiata de Iria Flavia. Grazas a esta intervención, puideron contextualizar mellor o valor patrimonial e cultural do espazo no que estaban a traballar.